Tafsilot

«Олим ёки толиби илм, олимларни тингловчи ёки илмни суювчи бўлинг. Илмнинг душмани бўлишдан сақланинг, акс ҳолда ҳалок бўласиз”, дегандилар Пайғамбаримиз Муҳаммад соллоллоҳу алайҳи ва саллам. Худди шунингдек инсон ҳар қанча шаккок бўлмасин, вужудида Яратганга иймон келтириш ҳисси борлигини доимо сезади. Бу туйғуни йўқота олиш инсоннинг қўлидан келмайди. Пайғамбаримиз соллоллоҳу алайхи ва саллам самога боқиб, »Шундай анвар юлдузларни яратиб қўйган Оллоҳга нега одамлар иймон келтирмайдилар-а”, дея йиғлаган. Юлдузларни одамлар йўқотолмаганларидек, қалбларидаги Оллоҳга бўлган иймонни йўқота олмайдилар. Фақат бугунги куннинг фожеаси, биз ўз кўнглимиздаги иймонга эътиборсиз бўлиб қолганимизда. "Шарқ юлдузи” ойномасида эълон қилинаётган Қуръони каримни ўзбек тилига таржима қилган Алоуддин Мансур билан Ислом дини, умуман диний адабиётлар таржимаси борасидаги суҳбатимиз ана шундай бошланди. Ушбу суҳбатимиз айни чоғда «Қуръон таржимони ким? У киши ҳақида ҳикоя қилинглар», деб илтимос қилувчиларга ҳам жавоб бўлади деган умиддамиз.